Ki smo?
Tko smo?
Wer sind wir?
40 let zvončari
Zametske maškare i zvončari - Darinko Jugo
 

O nama - Ki smo?

 


Ki smo?

Zametske maškare i zvončari su jedna od najstarejeh i najbrojnejeh karnevalskeh grup grada Reke. Zvončari va današnjen oblike postoje od 1971. leta, a tradicija maškaranja  je, prema nekemi izvori od početka 20. stoljeća. Za verovat je da su se judi maškarali još i puno raneje. 

 

Prema legendi, cilj maškaranja je da se na početke sakega mladega leta potiraju se nevoje, duhi i sa zla kako bi zemja mogla dobro rodit, a judi zdravi i veseli uživali va plodeh svojga truda. Judi to delaju maškaranjen, a na način da kroz tanci, pjesmu i škerci zabavjaju kako sebe tako i drugeh. Pisani dokumenti nan govore da su već na početke 20. stoljeća po oštarijah va Zamete održavani pusni tanci. Organizirali su ih oštari za svoji gosti, bilo je lepeh, maštoviteh maski, a tancalo se uz zvuki trieštinke, bubnja i basa. Na Pusni pundejak su grupe maškar hodile po kućah jaja pobirat, a judi su ih počastili z vinon, pršuton, al' kombasicami i s presnacon. Na Prvu sredu se j' sudilo Pustu ki je bil kriv za se loše ča se dogodilo pa su ga obesili i važgali. Se te mesopusne užance mi smo zadržali do danas, samo va puno širen i masovnijen izdanju.

Zametski zvončari nimaju tako dugu povijest kot maškare. 1968. leta su se na Pusni pundejak pojavili spontano prvi zvončari va Zamete ki su z maškarami šli skupa jaja pobirat. Bili su različito obučeni, a od 1971. leta Zametski zvončari zgledaju kot i danas. Zač su takovi kakovi su? Kako su od seh zvončarskeh grup najbliži moru, kot osnovu za izradu maske zeli su izgled Vikinga. Obučeni su va mornarsku majicu kratkeh rukavi, bele brageše s črjenun štrikun. Okol vrata imaju črjeni facol, a na nogah kopice i teški postoli. Škina njin je pokrivena z ovčjun kožun, a preko ramena njin je vezan jedan veli zvonac. Va ruke nose mačuku, a na glave baretu prekrivenu z ovčjun kožun i dva vela roga.

Zvončari hode zad svojun bandjerun i po direktive kapota. Va povorke hode jedan za drugen, al va križ i tuču zvonci med sobun. Povorka finjuje zvončarsken kolon va kjen zvončari obrnjeni škinami jedan od drugega jako tuču zvoni.